Молитвослов Православного Христианина с правилом ко святому Причащению

Тропари, кондаки и величания на праздники Господни, Богородичны, великих святых в порядке церковного года, который начинается с 1/14 сентября (с переводом на русский язык) 1/14 сентября Новолетие Тропарь, глас 2-й Всея твари Содетелю, времена и лета во Своей власти положивый, благослови венец лета благости Твоея, Господи, сохраняя в мире люди и град Твой, молитвами Богородицы, и спаси ны. note 1 Кондак, глас 2-й В вышних живый, Христе Царю, всех видимых и невидимых Творче и Зиждителю, Иже дни и нощи, времена и лета сотворивый, благослови ныне венец лета: соблюди и сохрани в мире град и люди Твоя, Многомилостиве. note 2 8/21 сентября Рождество Пресвятой Богородицы Тропарь, глас 4-й Рождество Твое, Богородице Дево, радость возвести всей вселенней: из Тебе бо возсия солнце правды, Христос Бог наш, и разрушив клятву, даде благословение, и упразднив смерть, дарова нам живот вечный. note 3 Кондак, глас 4-й Иоаким и Анна поношения безчадства, и Адам и Ева от тли смертныя свободистася, Пречистая, во святем рождестве Твоем. То празднуют и людие Твои, вины прегрешений избавльшеся, внегда звати Ти: неплоды раждает Богородицу и питательницу жизни нашея. note 4 Величание Величаем Тя, Пресвятая Дево, и чтим святых Твоих родителей, и всеславное славим рождество Твое. note 5 Задостойник, глас 8-й Чужде матерем девство, и странно девам деторождение; на Тебе, Богородице, обоя устроишася. Тем Тя вся племена земная непрестанно величаем. note 6 14/27 сентября Воздвижение Честного и Животворящего Креста Тропарь, глас 1-й Спаси, Господи, люди Твоя, и благослови достояние Твое, победы на сопротивныя даруя, и Твое сохраняя Крестом Твоим жительство. note 7 Кондак, глас 4-й Вознесыйся на Крест волею, тезоименитому Твоему новому жительству щедроты Твоя даруй, Христе Боже, возвесели нас силою Твоею, победы дая нам на супостаты, пособие имущим Твое, оружие мира, непобедимую победу. note 8 Величание Величаем Тя, Живодавче Христе, и чтим Крест Твой святый, имже нас спасл еси от работы вражия. note 9 Задостойник, глас 8-й Таин еси, Богородице, рай, невозделанно возрастивший Христа, Имже Крестное живоносное на земли насадися древо. Тем ныне возносиму, покланяющеся ему, Тя величаем. note 10 25 сентября/8 октября Преподобного Сергия Радонежского Тропарь, глас 4-й Иже добродетелей подвижник, яко истинный воин Христа Бога, на страсти вельми подвизался еси в жизни временней, в пениих, бдениих же и пощениих образ быв твоим учеником. Темже и вселися в тя Пресвятый Дух, Егоже действием светло украшен еси; но яко имея дерзновение ко Святей Троице, поминай стадо, еже собрал еси мудре, и не забуди, якоже обещался еси, посещая чад твоих, Сергие, Преподобне отче наш. note 11 Кондак, глас 8-й Христовою любовию уязвився, Преподобне, и Тому невозвратным желанием последовав, всякое наслаждение плотское возненавидел еси, и яко солнце Отечеству твоему возсиял еси, тем и Христос даром чудес обогати тя. Поминай нас чтущих пресветлую память твою, да зовем ти: радуйся, Сергие богомудре. note 12 26 сентября/9 октября Преставление святого Апостола и евангелиста Иоанна Богослова Тропарь, глас 2-й Апостоле, Христу Богу возлюбленне, ускори избавити люди безответны, приемлет тя припадающа Иже падша на перси приемый, Егоже моли, Богослове, и належащую мглу языков разгнати, прося нам мира и велия милости. note 13 Кондак, глас 2-й Величия твоя, девственниче, кто повесть? Точиши бо чудеса, и изливаеши исцеления, и молишися о душах наших, яко Богослов и друг Христов. note 14 1/14 октября Покров Пресвятой Богородицы Тропарь, глас 4-й Днесь благовернии людие светло празднуем, осеняеми Твоим, Богомати, пришествием, и к Твоему взирающе пречистому образу, умильно глаголем: покрый нас честным Твоим покровом, и избави нас от всякаго зла, молящи Сына Твоего Христа Бога нашего, спасти души наша. note 15 Кондак, глас 3-й Дева днесь предстоит в церкви, и с лики святых невидимо за ны молится Богу: Ангели со архиереи покланяются, апостоли же со пророки ликовствуют: нас бо ради молит Богородица Превечнаго Бога. note 16 Величание Величаем Тя, Пресвятая Дево, и чтем Покров Твой честный, Тя бо виде святый Андрей на воздусе, за ны Христу молящуюся. note 17 5/18 октября Святителей Московских: Петра, Алексия, Ионы, Филиппа и Ермогена Тропарь, глас 4-й Первопрестольницы Российстии, истиннии хранителие апостольских преданий, столпи непоколебимии, Православия наставницы, Петре, Алексие, Ионо, Филиппе и Ермогене, Владыку всех молите, мир вселенней даровати и душам нашим велию милость. note 18 Кондак, глас 3-й Во святителех благочестно пожисте, и люди к богоразумию настависте, и добре Богу угодисте; сего ради от Него нетлением и чудесы прославистеся, яко ученицы Божия благодати. note 19 22 октября/4 ноября, также 8/21 июля Празднование Казанской иконе Божией Матери Тропарь, глас 4-й Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегающим. Всех нас заступи, о Госпоже Царице и Владычице, иже в напастех и в скорбех, и в болезнех, обремененных грехи многими, предстоящих и молящихся Тебе умиленною душею, и сокрушенным сердцем, пред пречистым Твоим образом со слезами, и невозвратно надежду имущих на Тя избавления всех зол, всем полезная даруй, и вся спаси, Богородице Дево: Ты бо еси Божественный покров рабом Твоим. note 20 Кондак, глас 8-й Притецем, людие, к тихому сему и доброму пристанищу, скорой Помощнице, готовому и теплому спасению, покрову Девы. Ускорим на молитву, и потщимся на покаяние: источает бо нам неоскудныя милости Пречистая Богородица, предваряет на помощь, и избавляет от великих бед и зол, благонравныя и богобоящияся рабы Своя. note 21 Величание Достойно есть величати Тя, Богородице, честнейшую Херувим, и славнейшую без сравнения Серафим. note 22 8/21 ноября Собор Архистратига Михаила и прочих Небесных сил бесплотных Тропарь, глас 4-й Небесных воинств Архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны, припадающия прилежно и вопиющия: от бед избавите ны, яко чиноначальницы Вышних сил. note 23 Кондак, глас 2-й Архистратизи Божии, служителие Божественныя славы, Ангелов начальницы и человеков наставницы, полезное нам просите и велию милость, яко безплотных Архистратизи. note 24 13/26 ноября Память святителя Иоанна Златоуста Тропарь, глас 8-й Уст твоих, якоже светлость огня, возсиявши благодать, вселенную просвети; не сребролюбия мирови сокровища сниска, высоту нам смиренномудрия показа. Но твоими словесы наказуя, отче Иоанне Златоусте, моли Слова Христа Бога, спастися душам нашим. note 25 21 ноября/4 декабря Введение во храм Пресвятой Богородицы Тропарь, глас 4-й Днесь благоволения Божия предображение, и человеков спасения проповедание, в храме Божии ясно Дева является, и Христа всем предвозвещает, Той и мы велегласно возопиим: радуйся, смотрения Зиждителева исполнение. note 26 Кондак, глас 4-й Пречистый храм Спасов, многоценный чертог и Дева, священное сокровище славы Божия, днесь вводится в дом Господень, благодать совводящи, яже в Дусе Божественном, Юже воспевают Ангели Божии: Сия есть селение небесное. note 27 Величание Величаем Тя, Пресвятая Дево, Богоизбранная Отроковице, и чтим еже в храм Господень вхождение Твое. note 28 Задостойник, глас 4-й Яко одушевленному Божию кивоту, да никакоже коснется рука скверных; устне же верных, Богородице немолчно глас Ангела воспевающе, с радостию да вопиют: истинно вышши всех еси, Дево Чистая. note 29 27 ноября/10 декабря Иконы Божией Матери «Знамение» Тропарь, глас 4-й Яко необоримую стену и источник чудес стяжавше Тя, раби Твои, Богородице Пречистая, сопротивных ополчения низлагаем. Темже молим Тя: мир граду Твоему даруй и душам нашим велию милость. note 30 6/19 декабря Память святителя Николая Чудотворца Тропарь, глас 4-й Правило веры и образ кротости, воздержания учителя яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Николае, моли Христа Бога, спастися душам нашим. note 31 Кондак, глас 3-й В Мирех, святе, священнодействитель показался еси, Христово бо, преподобне, Евангелие исполнив, положил еси душу твою о людех твоих, и спасл еси неповинныя от смерти. Сего ради освятился еси, яко великий таинник Божия благодати. note 32 20 декабря/2 января Память святого праведного Иоанна Кронштадтского Тропарь, глас 1-й Православныя веры поборниче, земли Российския печальниче, пастырем правило и образе верным, покаяния и жизни во Христе проповедниче, Божественных Таин благоговейный служителю и дерзновенный о людех молитвенниче, отче праведный Иоанне, целителю и предивный чудотворче граду Кронштадту похвало и Церкве нашея украшение, моли Всеблагаго Бога умирити мир и спасти души наша. note 33 Кондак, глас 3-й Днесь пастырь Кронштадтский предстоит Престолу Божию и усердно молит о верных Христа Пастыреначальника, обетование давшаго: «Созижду Церковь Мою и врата адова не одолеют ей». note 34 25 декабря/7 января Рождество Господа нашего Иисуса Христа Тропарь, глас 4-й Рождество Твое, Христе Боже наш, возсия мирови свет разума: в нем бо звездам служащии, звездою учахуся Тебе кланятися Солнцу правды, и Тебе ведети с высоты Востока; Господи, слава Тебе. note 35 Кондак, глас 3-й Дева днесь Пресущественнаго раждает, и земля вертеп Неприступному приносит; Ангели с пастырьми славословят, волсви же со звездою путешествуют; нас бо ради родися Отроча младо, Превечный Бог. note 36 Величание Величаем Тя, Живодавче Христе, нас ради ныне плотию рождшагося от безневестныя и Пречистыя Девы Марии. note 37 Задостойник, глас 1-й Величай, душе моя, честнейшую и славнейшую горних воинств Деву Пречистую Богородицу. note 38 Любити убо нам, яко безбедное страхом, удобее молчание, любовию же, Дево, песни ткати спротяженно сложенныя, неудобно есть: но и, Мати, силу, елико есть произволение, даждь. note 39 1/14 января Обрeзание Господа нашего Иисуса Христа и память святителя Василия Великого Тропарь Обрeзанию, глас 1-й На престоле огнезрачнем в вышних седяй со Отцем Безначальным и Божественным Твоим Духом, благоволил еси родитися на земли от Отроковицы неискусомужныя Твоея Матере, Иисусе: сего ради и обрезан был еси яко человек осмодневный. Слава всеблагому Твоему совету; слава смотрению Твоему, слава снизхождению Твоему, Едине Человеколюбче. note 40 Тропарь святителю, глас 1-й Во всю землю изыде вещание твое, яко приемшую слово твое, имже боголепно научил еси, естество сущих уяснил еси, человеческия обычаи украсил еси, царское священие, отче преподобне: моли Христа Бога спастися душам нашим. note 41 Кондак праздника, глас 3-й Всех Господь обрезание терпит, и человеческая прегрешения яко благ обрезует, дает спасение днесь миру: радуется же в вышних и Создателев иерарх и светоносный, божественный таинник Христов Василий. note 42 Кондак святителю, глас 4-й Явился еси основание непоколебимое Церкве, подая всем некрадомое господство человеком, запечатлея твоими веленьми, небоявленне Василие преподобне. note 43 Величание Величаем тя, святителю отче Василие, и чтим святую память твою: ты бо молиши за нас Христа Бога нашего. note 44 2/15 января, также 19 июля/1 августа Преподобного Серафима Саровского Тропарь, глас 4-й От юности Христа возлюбил еси, блаженне, и Тому Единому работати пламенне вожделев, непрестанною молитвою и трудом в пустыни подвизался еси, умиленным же сердцем любовь Христову стяжав, избранник возлюблен Божия Матере явился еси. Сего ради вопием ти: спасай нас молитвами твоими, Серафиме, преподобне отче наш. note 45 Кондак, глас 2-й Мира красоту и яже в нем тленная оставив, преподобне, в Саровскую обитель вселился еси; и тамо ангельски пожив, многим путь был еси ко спасению; сего ради и Христос тебе, отче Серафиме, прослави, и даром исцелений и чудес обогати. Темже вопием ти: радуйся, Серафиме, преподобне отче наш. note 46 6/19 января Крещение Господне. Богоявление Тропарь, глас 1-й Во Иордане крещающуся Тебе, Господи, Троическое явися поклонение: Родителев бо глас свидетельствовавше Тебе, возлюбленнаго Тя Сына именуя, и Дух в виде голубине, извествоваше словесе утверждение. Явлейся, Христе Боже, и мир просвещей, слава Тебе. note 47 Кондак, глас 4-й Явился еси днесь вселенней, и свет Твой, Господи, знаменася на нас, в разуме поющих Тя: пришел еси и явился еси Свет неприступный. note 48 Величание Величаем Тя, Живодавче Христе, нас ради ныне плотию крестившагося от Иоанна в водах Иорданских. note 49 Задостойник, глас 2-й Величай, душе моя, честнейшую горних воинств, Деву Пречистую Богородицу. note 50 Недоумеет всяк язык благохвалити по достоянию, изумевает же ум и премирный пети Тя, Богородице; обаче Благая сущи, веру приими, ибо любовь веси Божественную нашу: Ты бо христиан еси предстательница, Тя величаем. note 51 Тропари на водоосвящении, глас 8-й Глас Господень на водах вопиет, глаголя: приидите, приимите вси Духа премудрости, Духа разума, Духа страха Божия, явльшагося Христа. note 52 Днесь вод освящается естество, и разделяется Иордан, и своих вод возвращает струи, Владыку зря крещаема. note 53 Яко человек на реку пришел еси, Христе Царю, и рабское крещение прияти тщишися, Блаже, от Предтечеву руку, грех ради наших, Человеколюбче. note 54 Слава, и ныне: Ко гласу вопиющаго в пустыни: уготовайте путь Господень, — пришел еси, Господи, зрак рабий приим, крещения прося, не ведый греха; видеша Тя воды и убояшася. Трепетен бысть Предтеча, и возопи глаголя: како просветит светильник Света, како руку положит раб на Владыку? Освяти мене и воды, Спасе, вземляй мира грех. note 55 30 января/12 февраля Память трех святителей: Василия Великого, Григория Богослова и Иоанна Златоустого Тропарь, глас 4-й Яко апостолов единонравнии и вселенныя учителие, Владыку всех молите, мир вселенней даровати и душам нашим велию милость. note 56 Кондак, глас 2-й Священныя и боговещанныя проповедники, верх учителей, Господи, приял еси в наслаждение благих Твоих и упокоение; труды бо онех и смерть приял еси паче всякаго всеплодия, Едине прославляяй святыя Твоя. note 57 2/15 февраля Сретение Господа нашего Иисуса Христа Тропарь, глас 1-й Радуйся, Благодатная, Богородице Дево, из Тебе бо возсия Солнце правды, Христос Бог наш, просвещаяй сущия во тьме. Веселися и ты, старче праведный, приемый во объятия Свободителя душ наших, дарующаго нам воскресение. note 58 Кондак, глас 1-й Утробу Девичу освятивый рождеством Твоим, и руце Симеоне благословивый, якоже подобаше, предварив, и ныне спасл еси нас, Христе Боже, но умири во бранех жительство и укрепи люди, ихже возлюбил еси, Едине Человеколюбче. note 59 Величание Величаем Тя, Живодавче Христе, и чтим Пречистую Матерь Твою, Еюже по закону ныне принеслся еси в храм Господень. note 60 Задостойник, глас 3-й Богородице Дево, упование христианом, покрый, соблюди и спаси на Тя уповающих. note 61 В законе, сени и писании образ видим вернии, всяк мужеский пол, ложесна разверзая, свят Богу. Тем перворожденное Слово Отца Безначальна, Сына первородящася Материю неискусомужно, величаем. note 62 25 марта/7 апреля Благовещение Пресвятой Богородицы Тропарь, глас 4-й Днесь спасения нашего главизна, и еже от века таинства явление: Сын Божий, Сын Девы бывает, и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою. note 63 Кондак, глас 8-й Взбранной Воеводе победительная, яко избавльшеся от злых, благодарственная восписуем Ти раби Твои, Богородице; но яко имущая державу непобедимую, от всяких нас бед свободи, да зовем Ти: радуйся, Невесто Неневестная. note 64 Величание Архангельский глас вопием Ти, Чистая: радуйся, Благодатная, Господь с Тобою. note 65 Задостойник, глас 4-й Благовествуй, земле, радость велию, хвалите, небеса, Божию славу. note 66 Яко одушевленному Божию Кивоту, да никакоже коснется рука скверных. Устне же верных Богородице немолчно, глас Ангела воспевающе, с радостию да вопиют: радуйся, Благодатная, Господь с Тобою. note 67 23 апреля/6 мая Память великомученика Георгия Победоносца Тропарь, глас 4-й Яко пленных свободитель и нищих защититель, немощствующих врач, Победоносче великомучениче Георгие, моли Христа Бога, спастися душам нашим. note 68 Кондак, глас 4-й Возделан от Бога показался еси благочестия делатель честнейший, добродетелей рукояти собрав себе, сеяв бо в слезах, веселием жнеши, страдальчествовав же кровию, Христа приял еси, и молитвами, святе, твоими всем подаеши прегрешений прощение. note 69 Вход Господень в Иерусалим (последнее воскресенье перед Пасхой) Тропарь, глас 1-й Общее воскресение прежде Твоея страсти уверяя, из мертвых воздвигл еси Лазаря, Христе Боже. Темже и мы яко отроцы победы знамения носяще, Тебе — Победителю смерти вопием: осанна в вышних, благословен Грядый во имя Господне! note 70 Другой тропарь, глас 4-й Спогребшеся Тебе крещением, Христе Боже наш, безсмертныя жизни сподобихомся воскресением Твоим, и воспевающе зовем: осанна в вышних, благословен Грядый во имя Господне! note 71 Кондак, глас 6-й На престоле на небеси, на жребяти на земли носимый, Христе Боже, Ангелов хваление, и детей воспевание приял еси зовущих Ти: благословен еси, грядый Адама воззвати. note 72 Величание Величаем Тя, Живодавче Христе, осанна в вышних, и мы Тебе вопием: благословен Грядый во имя Господне! note 73 Задостойник, глас 4-й Бог Господь и явися нам, составите праздник, и веселящеся приидите, возвеличим Христа, с ваиями и ветвьми, песньми зовуще: благословен Грядый во имя Господа Спаса нашего! note 74 Светлое Христово Воскресение. ПАСХА Тропарь, глас 5-й Христос воскресе из мертвых, смертию смерть поправ, и сущим во гробех живот даровав. note 75 Кондак, глас 8 Аще и во гроб снизшел еси, Безсмертне, но адову разрушил еси силу и воскресл еси, яко победитель, Христе Боже, женам мироносицам вещавый: радуйтеся! и Твоим апостолом мир даруяй, падшим подаяй воскресение. note 76 Задостойник, глас 1 Ангел вопияше Благодатней: Чистая Дево, радуйся! И паки реку: радуйся! Твой Сын воскресе тридневен от гроба, и мертвыя воздвигнувый: людие, веселитеся. note 77 Светися, светися, новый Иерусалиме: слава бо Господня на тебе возсия. Ликуй ныне и веселися, Сионе. Ты же, Чистая, красуйся, Богородице, о востании Рождества Твоего. note 78 Вознесение Господа Иисуса Христа (в 40-й день по Воскресении) Тропарь, глас 4-й Вознеслся еси во славе, Христе Боже наш, радость сотворивый учеником обетованием Святаго Духа, извещенным им бывшим благословением, яко Ты еси Сын Божий, Избавитель мира. note 79 Кондак, глас 6-й Еже о нас исполнив смотрение, и яже на земли соединив небесным, вознеслся еси во славе, Христе Боже наш, никакоже отлучаяся, но пребывая неотступный, и вопия любящим Тя: Аз есмь с вами, и никтоже на вы. note 80 Величание Величаем Тя, Живодавче Христе, и почитаем еже на небеса с пречистою Твоею плотию Божественное вознесение. note 81 Задостойник, глас 5-й Величай, душе моя, вознесшагося от земли на небо Христа Жизнодавца. note 82 Тя паче ума и словесе Матерь Божию, в лето Безлетнаго неизреченно Рождшую, вернии единомудренно величаем. note 83 Пятидесятница. День Святой Троицы (50-й день по Воскресении) Тропарь, глас 8-й Благословен еси, Христе Боже наш, Иже премудры ловцы явлей, низпослав им Духа Святаго, и теми уловлей вселенную. Человеколюбче, слава Тебе. note 84 Кондак, глас 8-й Егда снизшед языки слия, разделяше языки Вышний; егда же огненныя языки раздаяше, в соединение вся призва, и согласно славим Всесвятаго Духа. note 85 Величание Величаем Тя, Живодавче Христе, и чтим Всесвятаго Духа Твоего, Егоже от Отца послал еси божественным учеником Твоим. note 86 Задостойник, глас 4-й Радуйся, Царице, матеродевственная славо: всяка бо удобообращательная благоглаголивая уста витийствовати не могут, Тебе пети достойно; изумевает же ум всяк Твое Рождество разумети. Темже Тя согласно славим. note 87 9/22 мая Перенесение мощей святителя и чудотворца Николая Тропарь, глас 4-й Приспе день светлаго торжества, град Барский радуется, и с ним вселенная вся ликовствует песньми и пеньми духовными: днесь бо священное торжество, в пренесение честных и многоцелебных мощей святителя и чудотворца Николая, якоже солнце незаходимое возсия, светозарными лучами, разгоняя тьму искушений же и бед от вопиющих верно: спасай нас яко предстатель наш, великий Николае. note 88 11/24 мая Святых равноапостольных Мефодия и Кирилла, учителей Словенских Тропарь, глас 4-й Яко апостолом единонравнии и словенских стран учителие, Кирилле и Мефодие богомудрии, Владыку всех молите, вся языки словенския утвердити в Православии и единомыслии, умирити мир, и спасти души наша. note 89 Величание Величаем вас, святии равноапостольнии Мефодие и Кирилле, вся Словенския страны ученьми своими просветивших и ко Христу приведших. note 90 21 мая/3 июня Сретение Владимирской иконы Божией Матери (Тропарь этот также поется 23 июня и 26 августа) Тропарь, глас 4-й Днесь светло красуется славнейший град Москва, яко зарю солнечную восприемши, Владычице, чудотворную Твою икону, к нейже ныне мы притекающе и молящеся Тебе взываем сице: о пречудная Владычице Богородице, молися из Тебе воплощенному Христу Богу нашему, да избавит град сей и вся грады и страны христианския невредимы от всех навет вражиих и спасет души наша яко милосерд. note 91 24 июня/7 июля Рождество св. Иоанна Предтечи и Крестителя Господня Тропарь, глас 4-й Пророче и Предтече пришествия Христова, достойно восхвалити тя недоумеем мы, любовию чтущии тя: неплодство бо рождшия и отчее безгласие разрешися славным и честным твоим рождеством, и воплощение Сына Божия мирови проповедуется. note 92 Кондак, глас 3-й Прежде неплоды днесь Христова Предтечу раждает, и той есть исполнение всякаго пророчества: Егоже бо пророцы проповедаша, на Сего во Иордане руку положив, явися Божия Слова пророк, проповедник, вкупе и Предтеча. note 93 Величание Величаем тя, Предтече Спасов Иоанне, и чтим еже от неплодове преславное рождество твое. note 94 26 мая/8 июня Явление Тихвинской иконы Божией Матери Тропарь, глас 4-й Днесь, яко солнце пресветлое, возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный свыше благоговейне восприемши, прославляет Тя Богомати всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих, и спасет верою покланяющихся Его Божественному и Твоему Пречистому образу, Дево неискусобрачная. note 95 29 июня/12 июля Святых первоверховных апостолов Петра и Павла Тропарь, глас 4-й Апостолов первопрестольницы, и вселенныя учителие, Владыку всех молите, мир вселенней даровати, и душам нашим велию милость. note 96 Кондак, глас 2-й Твердыя и боговещанныя проповедатели, верх апостолов Твоих, Господи, приял еси в наслаждение благих Твоих и покой: болезни бо онех и смерть приял еси, паче всякаго всеплодия, Едине сведый сердечная. note 97 Величание Величаем вас, апостоли Христовы Петре и Павле, весь мир ученьми своими просветившия, и вся концы ко Христу приведшия. note 98 15/28 июля Память св. равноапостольного князя Владимира Тропарь, глас 4-й Уподобился еси купцу, ищущему добраго бисера, славнодержавный Владимире, на высоте стола седя матери градов богоспасаемаго Киева; испытуя же и посылая к Царскому граду уведети Православную веру, обрел еси безценный бисер, Христа, избравшаго тя яко втораго Павла, и оттрясшаго слепоту во святей купели душевную, вкупе и телесную. Темже празднуем твое успение, людие твои суще. Моли спастися державы твоея Российския начальником и множеству владомых. note 99 Кондак, глас 8-й Подобствовав великому апостолу Павлу, в сединах, всеславне Владимире, вся, яко младенческая мудрования, яже о идолех тщания оставль, яко муж совершенный, украсился еси Божественнаго Крещения багряницею; и ныне Спасу Христу в веселии предстоя, моли спастися державы Российския начальником и множеству владомых. note 100 20 июля/2 августа Память святого славного пророка Илии Тропарь, глас 4-й Во плоти ангел, пророков основание, вторый предтеча пришествия Христова, Илия славный, свыше пославый Елисееви благодать, недуги отгоняти, и прокаженныя очищати. Темже и почитающим его точит исцеления. note 101 Величание Величаем тя, святый славный пророче Божий Илие, и чтим, еже на Небеса на колеснице огненней преславное восхождение твое. note 102 6/19 августа Преображение Господа нашего Иисуса Христа Тропарь, глас 7-й Преобразился еси на горе, Христе Боже, показавый учеником Твоим славу Твою, якоже можаху, да возсияет и нам грешным свет Твой присносущный, молитвами Богородицы, Светодавче, слава Тебе. note 103 Кондак, глас 7-й На горе преобразился еси, и якоже вмещаху ученицы Твои, славу Твою, Христе Боже, видеша: да егда Тя узрят распинаема, страдание убо уразумеют вольное, мирови же проповедят, яко Ты еси воистинну Отчее сияние. note 104 Величание Величаем Тя, Живодавче Христе, и почитаем пречистыя плоти Твоея преславное преображение. note 105 Задостойник, глас 4-й Величай, душе моя, на Фаворе преобразившагося Господа. note 106 Рождество Твое нетленно явися, Бог из боку Твоею пройде, яко Плотоносец явийся на земли, и с человеки поживе. Тя, Богородице, тем вси величаем. note 107 15/28 августа Успение Пресвятой Богородицы Тропарь, глас 1-й В рождестве девство сохранила еси, во успении мира не оставила еси, Богородице, преставилася еси к животу, Мати сущи Живота, и молитвами Твоими избавляеши от смерти души наша. note 108 Кондак, глас 2-й В молитвах неусыпающую Богородицу и в предстательствах непреложное упование, гроб и умерщвление не удержаста: якоже бо Живота Матерь, к животу престави во утробу Вселивыйся приснодевственную. note 109 Величание Величаем Тя, Пренепорочная Мати Христа Бога нашего, и всеславное славим Успение Твое. note 110 Задостойник, глас 1-й Ангели Успение Пречистыя видевше, удивишася, како Дева восходит от земли на небо. note 111 Побеждаются естества уставы в Тебе, Дево чистая, девствует бо рождество, и Живот предобручает смерть; по рождестве Дева, и по смерти жива, и спасаеши присно, Богородице, наследие Твое. note 112 16/29 августа Празднование перенесения Нерукотворенного Образа Спасителя Тропарь, глас 2-й Пречистому Твоему образу покланяемся, Благий, просяще прощения прегрешений наших, Христе Боже: волею бо благоволил еси плотию взыти на Крест, да избавиши яже создал еси от работы вражия. Тем благодарственно вопием Ти: радости исполнил еси вся, Спасе наш, пришедый спасти мир. note 113 29 августа/11 сентября Усекновение главы Предтечи и Крестителя Господня Иоанна Тропарь, глас 2-й Память праведнаго с похвалами, тебе же довлеет свидетельство Господне, Предтече: показал бо ся еси воистинну и пророков честнейший, яко и в струях крестити сподобился еси Проповеданнаго. Темже за истину пострадав радуяся, благовестил еси и сущим во аде Бога явльшагося плотию, вземлющаго грех мира и подающаго нам велию милость. note 114 Кондак, глас 5-й Предтечево славное усекновение, смотрение бысть некое Божественное: да и сущим во аде Спасово проповесть пришествие. Да рыдает убо Иродия, беззаконное убийство испросивши: не закон бо Божий, ни живый век возлюби, но притворный, привременный. note 115 Величание Величаем тя, Крестителю Спасов Иоанне, и почитаем вси честныя твоея главы усекновение. note 116 Тропари и кондаки воскресные восьми гласов (с переводом на русский язык) Глас 1-й Тропарь Камени запечатану от иудей и воином стрегущим Пречистое Тело Твое, воскресл еси тридневный, Спасе, даруяй мирови жизнь. Сего ради силы Небесныя вопияху Ти, Жизнодавче: слава воскресению Твоему, Христе, слава Царствию Твоему, слава смотрению Твоему, Едине Человеколюбче. note 117 Кондак Воскресл еси яко Бог из гроба во славе, и мир совоскресил еси, и естество человеческое яко Бога воспевает Тя, и смерть исчезе; Адам же ликует, Владыко, Ева, ныне от уз избавляема, радуется, зовущи: Ты еси, Иже всем подая, Христе, воскресение. note 118 Глас 2-й Тропарь Егда снизшел еси к смерти, Животе безсмертный, тогда ад умертвил еси блистанием Божества; егда же и умершия от преисподних воскресил еси, вся силы Небесныя взываху: Жизнодавче Христе Боже наш, слава Тебе. note 119 Кондак Воскресл еси от гроба, всесильне Спасе, и ад, видев чудо, ужасеся, и мертвии восташа. Тварь же видящи срадуется Тебе, и Адам свеселится, и мир, Спасе мой, воспевает Тя присно. note 120 Глас 3-й Тропарь Да веселятся небесная, да радуются земная, яко сотвори державу мышцею Своею Господь, попра смертию смерть, первенец мертвых бысть; из чрева адова избави нас и подаде мирови велию милость. note 121 Кондак Воскресл еси днесь из гроба, Щедре, и нас возвел еси от врат смертных; днесь Адам ликует и радуется Ева, вкупе же и пророцы с патриархи воспевают непрестанно Божественную державу власти Твоея. note 122 Глас 4-й Тропарь Светлую воскресения проповедь от Ангела уведевша Господни ученицы и прадеднее осуждение отвергша, апостолом хвалящася глаголаху: испровержеся смерть, воскресе Христос Бог, даруяй мирови велию милость. note 123 Кондак Спас и Избавитель мой, из гроба яко Бог воскреси от уз земнородныя и врата адова сокруши, и яко Владыка воскресе тридневен. note 124 Глас 5-й Тропарь Собезначальное Слово Отцу и Духови, от Девы рождшееся на спасение наше, воспоим вернии и поклонимся, яко благоволи плотию взыти на Крест, и смерть претерпети, и воскресити умершия славным Воскресением Своим. note 125 Кондак Ко аду, Спасе мой, сошел еси, и врата сокрушивый яко Всесилен, умерших яко Создатель совоскресил еси, и смерти жало сокрушил еси, и Адам от клятвы избавлен бысть, Человеколюбче. Темже вси зовем: спаси нас, Господи. note 126 Глас 6-й Тропарь Ангельския силы на гробе Твоем и стрегущия омертвеша, и стояше Мария во гробе, ищущи Пречистаго Тела Твоего. Пленил еси ад, не искусився от него; сретил еси Деву, даруяй живот. Воскресый из мертвых, Господи, слава Тебе. note 127 Кондак Живоначальною дланию, умершия от мрачных удолий Жизнодавец воскресив всех Христос Бог, воскресение подаде человеческому роду: есть бо всех Спаситель, Воскресение и Живот, и Бог всех. note 128 Глас 7-й Тропарь Разрушил еси Крестом Твоим смерть, отверзл еси разбойнику рай, мироносицам плач преложил еси и апостолом проповедати повелел еси, яко воскресл еси, Христе Боже, даруяй мирови велию милость. note 129 Кондак Не ктому держава смертная возможет держати человеки: Христос бо сниде, сокрушая и разоряя силы ея. Связуемь бывает ад, пророцы согласно радуются: предста, глаголюще, Спас сущим в вере, изыдите вернии в воскресение. note 130 Глас 8-й Тропарь С высоты снизшел еси, Благоутробне, погребение приял еси тридневное, да нас свободиши страстей, Животе и Воскресение наше, Господи, слава Тебе. note 131 Кондак Воскрес из гроба, умершия воздвигл еси, и Адама воскресил еси, и Ева ликует во Твоем воскресении, и мирстии концы торжествуют, еже из мертвых востанием Твоим, Многомилостиве. note 132
more
Impression
Add to shelf
Already read
412 printed pages

Related booksAll

One fee. Stacks of books

You don’t just buy a book, you buy an entire library… for the same price!

Always have something to read

Friends, editors, and experts can help you find new and interesting books.

Read whenever, wherever

Your phone is always with you, so your books are too – even when you’re offline.

Bookmate – an app that makes you want to read

Related booksAll

Автор неизвестен
Тол­ко­вый пра­во­слав­ный мо­ли­ти­во­слов
Православный молитвослов
Ка­нон по­ка­ян­ный ко Гос­поду на­шему Иисусу Хри­сту
Семейный молитвослов, Вячеслав Пономарев
Вячеслав Пономарев
Семейный молитвослов
Семейный молитвослов, Павел Михалицын
Павел Михалицын
Семейный молитвослов
fb2epub
Drag & drop your files (not more than 5 at once)