Eve gelende sevgi al

Darıxmaq sözünün

sonundakı «q» hərifi belə

acıyıb halıma deyir ki,

istəyirsən gedim

təki sən darıxma.

Dərdlər kökəlib

qəm yeməyindən.

Sevinc pəhriz saxlayır

şad xəbərindən.

Qollarını gen açıb

“bax bu boyda” deyən

məsum bir uşağın

sevgi arşını qədər,

yer boyda, göy boyda

sevirəm səni.

Bəlkə də anamın

kürəyimə çəkdiyi

yod “kletka”sı kimi

Tanrı bütün

meridianları, paralelləri

Dünyanın sağalması üçün

yer kürəsinə çəkmişdi.

Ali təhsilli işsizlər kimi

ali sevgili qadınsızdım.

İxtisasca sevgini bitirsəm də

öz sevgim üzrə sevmirdim.

Düş aşağı bir dənə sevgi al gəl.

Nifrəti də götür at.

Dünəndən qalıb iylənib.

Əlləş,

ayaqlaş,

dilləş,

sözləş

və qorxma

üzləş

özünlə.

Burda insanları asmırlar.

Ya insanlar özlərindən

aslı olmayaraq özlərini asırlar

ya da ki, insanlar insanları

özlərindən asılı salırlar.

Qərara alıram:

Sevgi Nazirliyi yanında
Dövlət Nifrət Agentliyi yaradılsın.
Həddən çox dəyər verdiyimiz

adamlar üçün
Əlavə Dəyər Sevgisi
tədbiq edilsin.

Qərar qüvvəyə

mindiyi gündən
həyata keçirilsin.

Dəli olmuşam nədir bilmirəm.

Özüm-özümə elə tanış gəlirəm

sanki hardasa görmüşəm.