Salajro, prezo kaj profito: Kun Thomas Kuczynski: Markso popularigas Markson. Enkonduko en Karlo Markso

La sama metodo aplikendas ĉe la valoroj de ĉiuj varoj. Ni devas esti kapablaj redukti ilin ĉiujn al esprimo komuna al ĉiuj kaj distingi ilin nur per la proporcioj en kiuj ili entenas ĝuste tiun, kaj identan, mezuron.

Ĉar la interŝanĝvaloroj de la varoj estas nur sociaj funkcioj de tiuj aĵoj kaj havas nenion por fari kun iliaj naturaj kvalitoj, leviĝas unue la demando: Kio estas la komuna socia substanco de ĉiuj varoj? Ĝi estas la laboro. Por produkti varon, aplikendas certa kvanto de laboro por ĝi aŭ enlaborigendas en ĝin. Ĉe tio mi diras ne nur laboro, sed socia laboro. Kiu produktas aĵon por sia propra rekta uzado, por konsumi ĝin mem, ja kreas produkton, sed ne varon. Kiel memmastrumanta produktisto li havas nenion por fari kun la socio. Sed por produkti varon, la aĵo produktita de li devas ne nur kontentigi socian bezonon, sed lia laboro mem devas esti konsista parto kaj ero de la tuta laborsumo elspezata de la socio. Lia laboro devas esti parto de la labordivido ene de la socio.