Невялікі твор, завершаны ажно ў 2008 г., чакаў свайго выдання на 950-годдзе гораду Менску, бо прысвячаўся менавіта яму, сталічнаму і містычнаму гораду, яго жыхарам і настроям. Гэтым творам культурна-асветніцкі Цэнтр “Студыя-Мовія”, кіраўніком якога ад 2010 г. з’яўляецца аўтарка — Інэса Кур’ян, хацеў бы далучыцца да літаратурнай МЕНСКІВІЯНЫ і прылучыць сябе да шэрагу МЕНСКІВІЯНАЎ і МЕНСКІВІЯНСТВА. Трэба заўважыць, што падзеі твору наўмысна раскручваюцца паволі і зыблытана, паступова даходзячы да большай выразнасці і яснасці, тым самым паказваючы цяжкі працэс разважанняў пра горад і яго насельнікаў. Твор друкуецца ў аўтарскай рэдакцыі, са свядомым намерам прадэманстраваць той стан мовы і паняццяў, якія ўласцівы канкрэтнай “свядомай” жыхарцы гораду Менску пачатку ХХІ стагоддзя.
